سوهندا عبد الوهاب تكتب : تحت النقاب وجعٌ لا تداويه الكلمات: حكاية مأساة سكنت وجه صبية”

والله ياجماعه بعيدآ عن التحديات والصعوبات في كله والمطبات البنلاقيها يومي في العمل الطوعي ضغط البيت زايد شغلك الخاص زايد جوطة العمل الطوعي
محاولة الإستقطاع من وقتك الخاص لبلدك زمن راحتك وبيتك واسرتك واهلك .

ممكن زياده ع كدا تلاقيك قصص موجعه تحميك النوم عديل
امس بعد خلاص طالعين ابولين جاب واحده داخله المكتب قالي شوفيها

قلت ليها تعالي ..بت صغيره ومنقبه ماظاهر منها شي غير صوتها
قلت ليها أرمله ؟قاتلي لا طيب زوجك مفقود قاتلي لا
متزوجه لا عايزه كسوه لا سؤال الكسوه دا بعده ماقدرت تسكت الردود دي طبعآ وهي بتبكي بكل ماعندها قلت ليها كدي اقعدي وشلت منها اوراقها
مالك طيب
زحت النقاب من وشها لاحول ولا قوة إلا بالله وشها كله مشيول وعينها قربت تقع كان في تدوين ايام الحرب ف ام درمان ومعاها إفادة كاملة بوفاة كل أسرتها 8من اخَوانها واخواتها وامها وابوها..ل لحظه حسيت لو اديتها قروش المبادرة كلها وزدتهن اضعاف م بقدر امسح دمعتها
حسيت روحي عاجزة عن مواساتها تمامآ💔

البت دي جات بس كانت محتاجه علاج بميه عشان يوقف جفاف العين ومن بعده تخش ف عملية جات من الصباح
عشان تقدر تشتري علاجاتها بس ..
قدر مايكون زول لاقى مآسي ف الدنيا اصلو ماح يكون وصل مرحلة تصحى من الصباح تلقى اهلك كلهم ميتين ومقطعين جنبك بدانات

والله ويشهد الله انا البت دي شكلها ووجعتها وبكيتها
والصوت الكانت معبوره وبكت بيهو لمن قلت ليها عايزه كسوه تاعب نفسيتي من امس وماقادره ابقى طيبه
ف عشان كدا لمن زول يدعي لي يقول لي ربنا يقويك بحسها دعوة غالية شديد والله لأنها ممكن بمنظر بس تسمعو من زول عابر حياتك تمسخ شمال ويمين وتصل مرحلة الإنهيار والتعب النفسي البتحس فيه بطنك طامه من كله 💔 ..ساي والله بنتظاهر بالقوه عشان في ناس عشمانه ومنتظرانا لكن الواحد منتهي رسمي
فرج الله عن كل محتاج وفك كرب كل مكروب وأذهب حزن كل حزين يارب العالمين
ونصر الله قوات شعبنا المسلحة وكل من يقاتل في صفها من أجل الأرض والعرض وضمد جراح كل البلد ومسح أحزان كل من إكتوى بويلات الحرب.