عمك خوجلي معلم بالمعاش وكبير في السن .. جا مارق صلاة الصبح شاف حاجة تلمع في الضلام رفعها لقاها موبايل حديث جدا وشالو ختاهو في جيبو.
بعد الصلاة والدنيا برد يقطع القلب مرق الكرسي قعد في الشارع ملفوف بالبطانية والناس مستغربين في القعدة العجيبة الما متعودين عليها لأنو الأستاذ نادرا مايمرق كرسيهو يقعد في الشارع .. الساعة تمانية والشمس شرقت جو ولدين متباريين ويتلفتو ويكوسو كواسة زول فاقد ليهو غرض وعمك ناداهم وسألم مالكم بتكوسو في شنو .. وأول ما وروهو بالغرض مرق ليهم التلفون من جيبو اداهم ليهو ودخل بيتو قبل ماينتهو من تشكراتم وفرحتم
.
عباس ركس بتاع الدكان قاليهو يا أستاذ خوفتني عليك لما شفتك قاعد في القرة دي كان ممكن تديني الغرض وأنا اشوف ليك سيدو ولا إنت مابتضمني .. عمك خوجلي قاليهو مابتقصر ياعباس ياولدي بس أنا معلم وقضيت عمري واقف قدام السبورة اشرح للتلاميذ ديل معنى الامانة .. ممكن يكون سيد الرايحة دا من تلاميذي .. فكان لازم أعمل تطبيق حرفي بنفسي عشان مايفتكرو كلام ساي بس المشكلة التطبيق المرة دي جاني في نص البرد وأنا راجل عجوز ومكعكع.
عباس ركس ابتسم وقاليهو وييييين يا لسة شباب يا أستاذ .. بعدين يا أستاذ شعورك شنو لما لقيت في نص الضلام تلفون سمح زي دا بيلمع في الأرض كانت مفاجأة مش ؟؟
المرة دي أستاذ خوجلي هو القعد يضحك لما عيونو دمعت وقاليهو مفاجأة … أنا يا أبني بجيني تلميذ صغير يادابو بدا بتعلم الكلام وبعد فترة بمشي المستشفيات بلقى نفس التلميذ دا دكتور .. بمشي في الشارع بلقاهو ضابط وبمشي مناسبة بلقاهو مهندس وبكون قاعد في مكتب الناظر بجيني نفس التلميذ دا وهو زميلي ومعلم معاي في نفس المدرسة
أنا أستاذ معلم .. تعرف يعني شنو تكون معلم .. يعني أنا البصنع المفاجأة قدام الناس 💚💚