أثناء عملي في واحد من مراكز الإيواء في مدينة بورتسودان، قابلت حاجّة كبيرة واجهت مشكلة في تلقّي المُعينات المُقَدّمة بواسطة الهلال الأحمر، الحالة دي ما بنساها أبداً، اتونست معاها شوية و وجّهتها تعمل شنو، قالت لي إنها جات من الخرطوم من جبرة و هسي قاعدة في مركز إيواء، قلت ليها أنا برضو من الخرطوم و كنت بجي جبرة عشان أشرب شاي مع أصحابي هناك جنب حلواني إيلاف، و حكت لي عن معاناتها مع النزوح الأصاب معظمنا، بعد دوام طويل في المركز استمر ل 10 ساعات متواصلة، جينا طالعين بالعربية جاتني تاني قالت لي يا ولدي أنا لسة ما جاتني حاجة، و يا أبوي أنا راجعة و ما عندي حق المواصلات أعمل شنو، قالت لي عايزة قروش أوصل بيهم الحتة القاعدة فيها، أديتها و رجعنا المكتب و نسيت الموضوع و نسيت شكل المرة الكبيرة ..
الليلة لاقتني تاني في نفس مركز الإيواء و قدرنا نساعدها الحمد لله، لمن طلعت أصلّي الضهر لاقتني و معاها بتها مبسوطين، قالت لي أنا الكان اتكلمت معاك المرة الفاتت، متذكرني؟ قلت ليها أيوه يا خالتو متذكرك إن شاء الله أموركم اتزبطت، قالت لي اتزبطت الحمد لله، وهسي عايزين رقمك عشان نتواصل معاك لأنو احتمال نسافر حلفا الأيام الجاية، و طلعت قروش من محفظتها قالت لي ده حق أمبارح حلفت إلا أرجعو ليك، قلت ليها ما بشيل منك أنا حلفت قبليك يا حاجة ما بشيل منك أي حاجة الحالة واحدة و الله ..
رجعت تاني للشغل، بعد ساعتين جات تاني أدتني كيس، قالت لي إنت اسمك منو ما سجلت اسمك في التلفون، قلت ليها اسمي عبدالسلام يس، قالت لي أمسك يا عبدو يا ولدي دي هدية مني، قلت ليها ده شنو يا حاجّة مافي داعي و الله، حلفت و أصرّت علي إلا أشيل الكيس، في النهاية طلعت الهدية التفاح ده!
“الإنسان ده لمن يعزم على الإحسان ببلغ فيهو مبالغ بعيدة جداً، و ده من توفيق ربنا سبحانه و تعالى، إنو الزول لمن يكبر في نفسه إحسان الآخرين ليهو، فيبقى عازم على مكافأتهم فيحسن بذلك و تستمر سلسلة الإحسان لا يقطعها إلا محروم..!”
و هل جزاء الإحسان إلا الإحسان!
