الناس كلها بتعرف الحصل لي في حياتي… إنو فقدت يديني
لكن القليل البعرف إنو ربنا عوضني بزول زي مدثر
الولد دا بقى معاي في كل تفصيلة في حياتي من أصغر حاجة لأكبر حاجة
من يوم الحصل لي الحصل ومدثر بقى حاضر في حياتي بطريقة مختلفة الزول دا ما بخليني أحس إني ناقص حاجة بالعكس مرات بحس إنو هو الشايل الهم بدلي
الناس مرات بتسألني:
“يا يوسف، بتدبر أمورك كيف؟
وأنا أضحك وأقول ليهم
عندي مدثر والباقي هين
الولد دا بقى حافظ تفاصيل يومي أكتر مني عارف أنا بحب أشرب الشاي متين وبعرف لو زهجت من سكاتي وبعرف لو ضحكتي دي وراها وجع ولا وراها هزار
والله يا جماعة في مواقف بيني وبينو كتيرة بتخليني أحمد ربنا إنو عندي أخ زي دا
مرات بكون قاعد ساكت أفكر في الحصل لي في حياتي
في الحاجات الاتغيرت
فجأة يجي يقعد جنبي ويقول
اسطورة إنت أقوى زول بعرفو والله
مرة كنا طالعين مشوار بدري وأنا لسه صاحي من النوم كده متكاسل
لقيتو واقف جنبي يقول لي
يلا يا معلم خلينا نتحرك بدري قبل الواطه تبقي حر
قلت ليهو
انت ما تعبت مني؟ كل يوم معاي في مشاويري كده
ضحك وقال لي
يازول انت أخوي يا زول التعب معاك ما اسمو تعب زاتو
والله الكلمة دي وقفتني لأنو في الزمن دا قليل تلقى زول واقف معاك بالقلب كده
مدثر دا ما بيساعدني عشان واجب
ولا عشان الناس تقول أخوك كويس
الولد دا بعمل الحاجات بحب حقيقي والله
الجميل في علاقتنا إنو ما فيها تكلف
نضارب بالكلام نضحك نعمل مقالب في بعض ونرجع بعد خمس دقايق كأنو ما حصل شي
والأخوان الصغار ديل نعمة كبيرة من ربنا وجودهم في حياتك بديك إحساس بالأمان إحساس إنك ما براك مهما كانت الظروف
ويا مدثر
لو يوم قريت الكلام دا خلي حاجة واحدة تكون واضحة ليك:
إنت ما أخوي الصغير بس
إنت نعمة كبيرة في حياتي
وإنت الزول البخليني كل يوم أقول
الحمد لله إنو ربنا ما خلاني أمشي الطريق دا براي
انت ضحكتي لمن أزهج
ونسـي لمن أسكت
وسندي في الحياة
ربنا يخليك لي يا أخوي
وما يحرمني منك أبداً ❤️
